अमिताभ बच्चनाचो कौन बनेगा करोडपती हो टीव्ही शो अजनूय गाजत आसा. हातूंत आसात प्रस्न. प्रस्न. प्रस्न. जापो. जापो. जापो. क्वीज म्हळ्यार प्रस्नमंच सर्त लोकां- लोकां मेरेन पावोवपाक ही कार्यावळ कारण थारल्या.
क्विजांत आसता एक खोसदिणी उर्जा. एक थ्रील. एक वीज कशी उमळशीक. कोण तरी जाप सांगूंक चुकता आनी अखेरेक क्वीज मास्टर खरी जाप सांगता. चुकिल्लो दुसरोच आसता. पूण ते प्रक्रियेंतल्यान ही माहिती सगळ्यांक मेळटा आनी मनोरंजक पध्दतीन यादीक उरता.
सांगपाचो आपरोस – क्वीज हें शिकोवपाचें आनी शिकपाचें एक बरें प्रभावी माध्यम. वर्गांत शिक्षकान केन्नाय इतिहास, भुगोल, विज्ञान, गणित ह्या विशयांचेर क्वीज घेवचें. फकत धा मिणटां. जीं भुरगीं चुकतात आनी तातूंतल्यान जी जाप मेळटा तेन्ना सगल्यांकूच ती याद उरता. कारण शिक्षणाचो चडसो भाग हो फकत माहिती याद दवरपाचेरूच केंद्रीत आसा.
म्हाका कितलेश्योच प्रस्नमंच म्हळ्यार क्वीज सर्तींचें संचालन करपाची संद मेळ्ळी. गोवा युवा महोत्सव सुरू जालो तेन्ना संदेश प्रभुदेसायाच्या आग्र्याक लागून ह्या वर्सुकी महोत्सवांत सुरवातीचीं कांय वर्सां प्रस्नमंच सर्त मुखेल माचयेर म्हाका घेवची पडली. तातूंत गोंय, गोंयचो इतिहास, भुगोल, राजकारण, समाजकारण, अर्थकारण, चालू घडामोडी, खेळ, म्हान गोंयकार आनी गोंया कडेन संबंदीत वेगवेगळ्या विशयांचेर प्रस्न आसताले.
कालांतरान गोंय मुक्ती चळवळ ह्या विशयाचेर सुटकेझुजारी सर्गेस्त विश्वनाथ लवंदे हांच्या कुटुंबियांनी दर वर्सा पर्वरी आंतर महाविद्यालयीन क्वीज सर्त घडोवन हाडली. हे वर्सुकी सर्तींतूय पयली सेगीत निदान स वर्सां क्वीज सर्तीचें संचालन म्हाका करचें पडलें. तातूंत शिकपाक मेळ्ळें. शिकोवपाक म्हळ्यार माहिती वेगळे पध्दतीन दिवपाक मेळ्ळें. दर वर्सा नवे प्रस्न काडपाचें एक आव्हान आसतालें. कारण शिक्षक तशेंच विद्यार्थी त्या त्या वर्सा विचारील्ले प्रस्न आनी जापो डायरेचेर तात्काळ नोंद करताले. देखून गोंय मुक्ती चळवळी विशींचे कितलेशेच इतिहासाचे ग्रंथ बारीकसाणेन अभ्यासचे पडले. नवे प्रस्न काडपाक!
विविध विशयांचेर क्वीज सर्ती गोंयांत जाताल्यो. तातूंत त्यो घेवपाक म्हाका क्वीज मास्टर म्हूण आपोवणें येतालें. गणित हो म्हजो स्पेशलायझेशनचो विशय. ह्या विशयांत हांवें अध्यापन लेगीत केलां. आवडीचो विशय. गोंयांत गणित शिक्षकांची संघटना आसा. ती संघटना दर वर्सा क्वीज सर्त घेता. गणित विशयाचेर तोंडी सर्त घेवप हीं फकांडांचीं कामां न्हय. प्रस्न लेखी स्वरुपाचे आसूंक फावना. ते उत्कंठा वाडोवपी आसूंक जाय. तातूंत विविधता जाय. देखीक – तर्कशास्त्र जाय. अंकगणित जाय. भूमिती जाय. एकदां पर्वरी आनी एकदां खांडेपारा अश्यो दोन खेपे हांवें ह्या अखील गोंय तोंडी गणित क्वीज सर्तीचें संचालन केलें. तातूंत खूब आनंद आयलो. भुरग्यांकूय वेगळे प्रस्न, वेगळो क्वीज मास्टर, वेगळी पध्दत हाची खोस आशिल्ली. हे सर्तींत वांटेकार जाल्ले कांय भुरगे आयज इंजिनियर बी जावन विदेशांत आसात. ते अजुनूय ह्या क्वीज सर्तीची याद काडटात. देख दिवनूच सांगतां. एकदां एक भुरगो फायनलींत पावलोना. सेमीफायनलींत एका प्रस्नाची जाप ताकतिकेन दितना तो मातसो चुकलो आनी निमणे फेरयेंत पावपाक हुकलो. पूण फायलनींतल्या स्पर्धकांक जमनाशिल्ल्यो जापो जेन्ना प्रेक्षकवर्गाक विचारल्यो, तेन्ना त्या भुरग्यान त्यो अचूक दिल्यो. ताची तोखणाय हांवें केली. आरे, तूं हांगाच माचयेर फायनलीक आसपाचो मरे अशी शाबासकी दिली. ती अपुरबाय तो आय़ुश्यभर विसरलोना. ताचो बापूय लेगीत ही गजाल सांगत आसता. तात्पर्य – क्वीज मास्टरान भुरग्यांची अपुरबाय करची. क्वीज मास्टर सर्वज्ञ आसना. ती सगळी एक शिकपाची प्रक्रिया आसता. खेळकर आनी आनंदी वृत्तीन.
कोंकणी भाशा आनी साहित्य ह्या विशयाचेर हांवें युवा साहित्य संमेलनांनी क्वीज सर्ती घेतल्यो. एकदां काणकोणा आनी एकदां म्हापश्यां ह्यो सर्ती घेतिल्ल्याची याद जाता. शालेय पांवड्यार लेगीत कवळ्यां, मंगेशीं आनी हेर सुवातांनी क्वीज सर्ती घेतिल्ल्याच्यो जायत्यो यादी आसात.
भारत पेट्रोलीयमाच्या अधिकाऱ्यांचो एक पंगड एकदां म्हज्या ऑफिसांत रेडियोचेर आयलो. तांकां भारतीय स्वातंत्र्य संग्राम ह्या विशयाचेर एक क्वीज करपाक जाय आशिल्लें. पणजी दूरदर्शना खातीर. वेळ कमी आशिल्लो. ताचें चित्रीकरण कला अकादमीच्या ब्लॅक बॉक्स सभाघरांत जालें. तोवूय एक वेगळोच अणभव आशिल्लो.
टीव्ही खातीर खूब खेपे वेगवेगळ्या विशयांचेर क्वीज घेतलें. एकदां विज्ञान ह्या विशयाचेर. एकदां सर्वसादारण विशयाचेर. एकदां म्युझीयम खात्यान क्वीज घेवंक सांगलें. पणजेंत आपल्या सभाघराच्या माचयेर. केलें. एकदां धेंपे कॉलेजांत जंय हांव शिकलों थंय, गिरायक वेव्हार ह्या विशयाचेर क्वीज घेवपाक आपयल्लो. वेगळोच विशय. इतले प्रस्न खोदून सोदून कशे काडप आनी ताची मांडावळ कशी करप होच एक प्रस्न. पूण तोवूय अणभव खूब कितें शिकोवन गेलो. तें क्वीज एकदम बरें आनी यशस्वी जालें.
प्रस्न प्रस्न आनी प्रस्न. संगीत वा आवाजाचेर आदारिल्ले प्रस्न. चित्रांचेर आदारिल्ले प्रस्न. एकार एक माराण पेटचे तशे धडाधड प्रस्नांचो शिंवर करपी प्रस्न. म्हणजेच रॅपिड फायर रावंड. वेगवेगळे तरेच्यो फेरयो. क्वीजांत आसता एक खोसदिणो जादू.
प्रस्नमंच सर्त सादर करपाक क्वीज मास्टराक सादरीकरणाची बरी कला आंगांत आसल्यार बरें. तातूंत थोडोसो अभिनय जाय. वाचिक अभिनय तर जायूच जाय. आवाजांत नेट जाय. उमेद जाय. जोश जाय. उर्जा जाय. आवाजांत चड-उतार जाय. प्रेक्षकवर्गाक खेंचून दवरपाची आनी लक्ष वेधून घेवपाची कळाशी जाय. क्वीज घेतल्याक हजरजबाबीपण आनी समयसूचकपणा जाय. मातसो विनोद जाय. स्पर्धकांक उर्बा दिवपाक कळूंक जाय. घोडचूक केली तरी ताका मातसो चुकलो, वेंताक चुकलो आनी वांवांक चुकलो अशें सांगून उत्तेजन दिवन मुखार हाडपाची नमळाय जाय. स्पर्धकांचो ताण आनी आबूजपण हलकें करून नाच्च करपाची कळाशी जाय. हांवें इंग्लीशींत आनी कोंकणींत दोनूय भाशांनी क्वीज सर्ती घेतल्यो. तो आनंद तस्सो आसा.
आमच्या देशांत काळो -धवो टीव्ही आयलो तेन्ना दूरदर्शनाचो एकूच चॅनल येतालो. ताचेर सिध्दार्थ बसू हाणें क्वीज लोकप्रिय केलें. सिध्दार्थ बसून उपरांत बीबीसी क्वीज लेगीत गाजयलें. ताचेर पुस्तकांय आयल्यांत. तातूंत तो दोन भाग घेतालो. पयल्या भागांत सामान्य गिन्यानाचेर आदारीत 20 प्रस्न आसताले. उपरांत दुसऱ्या भागांत स्पर्धकान मागला त्या आवडीच्या विशयांतले 20 प्रस्न आसताले. समजा कोणे गोंय मागलें वा एकाद्र्यान गणपती हो विशय घेतलो जाल्यार ताचेर खोलायेन प्रस्न आसताले. बरेच कठीण. हे प्रस्न रॅपीड फायर प्रकाराचे आसताले. एकार एक आर्माच्यो गुळयो कश्यो ढा ढा ढा करून तो विचारतालो. याद करपाक दोन सेकंद बी मेळटाले आसुंये. सिध्दार्थ बसून उपरांत अमिताभ बच्चन घेता त्या कौन बनेगा करोडपती ह्या टीवी शोचे प्रस्न काडपाची जापसालदारकी घेतली. ती यशस्वीपणान पेलली. बसू सारक्याच आनीक जायत्या जाणांनी वेगवेगळ्या विशयावेले क्वीज शो, टीव्हीचेर गाजोवन, आपलें त्या त्या विशयांतलें प्रभुत्व दाखोवन दिलें. खेळ विशयाचेर वा क्रिकेट विशयाचेर वा हेर विशयांचेर कितलेशेच हुशार आनी बुदवंत, आपली विशेश छाप सोडपी क्वीज मास्टर आसात. ही वळेरी खूब व्हड.
वृत्तनिवेदक पदांच्यो वा हेर मुलाखती घेवपाक वचपाची संद खूब खेपे मेळटा. उमेदवारांक प्रस्न विचारतकच कळटा की तांचें सामान्य गिन्यान उणें आसा. आपल्या भोंवतणी कितें घडटा ताची जाण आनी भान भुरग्यांक, तरणाट्यांक आसूंक जाय. हे खातीर भुरग्यांनी सामान्य गिन्यान मेळोवपाक वाचूंक जाय. पळोवंक जाय. आयकूंक जाय. कान दोळे उकते दवरूंक जाय. प्रस्नमंच सर्तींत वांटो घेवंक जाय. वा तातूंत पळोवपा खातीर तरी सहभागी जावंक जाय.
इटलीचो आनी जर्मनीचो इतिहास खबर आसल्यार वायट न्हयच. ज्या गोंयांत आपूण रावतां त्या गोंयाविशीं आपणाक खबर आसूंक जाय. गोंयची भाशा कोंकणी, कोंकणींतलें साहित्य, कोंकणी नाटकां, तियात्र, सिनेमा, वेगवेगळ्या वाठारांतलो लोकवेद, कोंकणी संगीत हाचें मुळावें गिन्यान आसूंक जाय. ते नदरेंतल्यान गोंय ह्या विशयाचेर क्वीज सर्ती जायत रावंक जाय. ह्या क्वीज सर्तींनी अती आर्विल्ल्या तंत्रगिन्यानाचो वापर करूंक जाय. तें करपाक आमचे आयचे हुशार तरणाटे सक्षम आसात.
आयचे घडयेक आमकां मेळ्ळ्यांत समाजीक माध्यमां. इंटरनेट आसा. ते संबंदीत आनीक कितल्योश्योच गजाली आमचे कडेन आयल्यात. ताचो बरो वापर आमी करून घेवंक जाय. गोंय आनी कोंकणी ह्या विशयाचेर ऑनलायन क्वीज घडूंक जाय. वॉट्स एप ग्रुपांचेर आयचो क्वीज प्रस्न येवंक जाय. ताची जाप मेळूंक जाय. जण एकल्यान आपल्या समाजीक माध्यमांवेल्यान स्टेटसाचेर अदींमदीं एक प्रस्न आनी ताची जाप घोळोवंक जाय. आयज आख्खें जग हाताच्या तळव्यार म्हणजे हातांतल्या स्मार्टफोनाचेर आयलां. क्लीक करिनाफुडें ती माहिती जगभर पावता. क्वीज हो विशय रंजक पध्दतीन अशे तरेन गांवार आनी वाऱ्यार घालपाच्यो नव्यो पध्दती केळोवंक जाय. ते खातीर फेसबूक वापरूं नाजाल्यार छापील वा हेर पीडीएफ स्वरुपांतल्या पुस्तकांचो वापर जावं. तें घडत रावंक जाय. भुरग्यांक सज्ञान करपाक. हुशार करपाक. कारण शणै गोंयबाबान सांगलां ते प्रमाण - आमी बाबत कुळां न्हय.
हो लेख सोंपयतना हांवें गोंय विशयावेल्या क्वीज सर्तींनी आसपावीत केल्ले कांय प्रस्न पतीक दितां. ताच्यो जापो दिल्यात कंसांत.
आफोंस द आल्बुकेर्क हांणी गोंय खंयच्या वर्सा जिकलें? (1510)
शणै गोंयबाब हांचें पूर्ण नांव कितें? (वामन रघुनाथ वर्दे वालावलीकार)
गोंय विधानसभेचे आदले सभापती आनी गोंयांतले नामनेचे तियात्रीश्त. तांणी तियात्राचेर पुस्तकांय उजवाडायल्यांत. नांव सांगात. (तोमाजीन कार्दोझ)
जिवबादादा पुरस्कार खंयच्या मळावयल्या क्षेत्रांतल्या मानेस्तांक दितात? (खेळ)
गोंय, दमण आनी दीव संघप्रदेशाचे विधानसभेचे पयले सभापती आनी स्वातंत्र्यसैनीक. नांव बरयात. ------(पां.पु.शिरोडकार)
कांदोळे गांवचो हो संवसारीक नामनेचो मानसोपचारतज्ञ. हिप्नॉटीस्ट. ताचो पुतळो पणजेंत आसा. नांव सांगात. (आबे फारीय)
विधानसभेचो वांगडी म्हळ्यार आमदार जावपाक उणीच कितलीं वर्सां जावचीं पडटा? (25)
मान्नी पुनव जात्रा गोंयांत खंयच्या गांवांत मनयतात? (माशेल)
म्हापशेंचो नामनेचो सप्तकी बाजार सप्तकाच्या खंयच्या दिसा भरता? (शुक्रार)
नायलॉन स, स हो कारखानो गोंयांत फोंडें तालुक्यांतल्या ह्या गांवांत येवपाचो आशिल्लो. लोकांच्या विरोधाक लागून तो आयलोना. गांव खंयचो? (केरी)
नुस्त्याक हें घातक रसायन सारयतात म्हूण गोंयांत वाद जाल्लो...... (फॉरमॅलीन)
संवसारीक योग दीस ह्या दिसा मनयतात. तारीख आनी म्हयनो. (21 जून)
भारतीय लश्करान कारवाय करून गोंयाक पोर्तुगीजांच्या सत्तेंतल्यान मुक्ती दिली. ताचें नांव ऑपरेशन..... (विजय)
लोकसभेंत आनी राज्यसभेंत खासदार आशिल्लो. गोवा कोंकणी अकादेमीचो पयलो अध्यक्ष. स्वातंत्र्यसैनीक. नांव सांगात. (पुरूषोत्तम काकोडकार)
मुळाव्या हक्कांक बादा येता तेन्ना दाद मागपाक नागरीक, उच्च न्यायालयांत वा सर्वोच्च न्यायालयांत अर्ज करता, तेन्ना त्या याचिकेक ------- पीटीशन अशें म्हणटात. (रीट)
हरमल गांव खंयच्या तालुक्यांत येता? (पेडणे)
मोल्यां अभयारण्य आसा ताचें नांव कितें? (भगवान महावीर अभयारण्य़)
भारताच्या बायलांच्या क्रिकेट पंगडांतल्यान संवसारीक बायलां क्रिकेट सर्तींत खेळिल्ली गोंयची खेळगडी कोण? (शिखा पांडे)
नामनेचे व्यंगचित्रकार मारीयो मिरांडो गोंयांतल्या ह्या गांवांतले.... (लोटली)
420 हें फटवणुकी संदर्भांतलें कलम. तें खंयच्या कायद्यांत आसपावता? (इण्डियन पीनल कोड वा भारतीय दंड संहिता)
पणजेंतल्या कला अकादमीचो आराखडो म्हळ्यार प्लान एका नामनेच्या गोंयकार आर्किटेक्टान काडला. डिजायन केला. ताचें नांव.... (चार्लस कुर्रेय्या)
म्हाड्डोळच्या देवळांत दर वर्सा जायांची पुजा जाता. देवळाचें नांव (म्हाळसा)
जांबावलेचो गुलाल दर वर्सा सप्तकांतल्या ह्या दिसा मनयतात. (मंगळार)
केप्यां दत्त मंदीर आसा, ताचे लागीं न्हंय आसा ते न्हंयेचें नांव सांगात. (कुशावती)
फुटबॉलाच्या मळार गोंयांतल्या दोन खेळगड्यांक अर्जुन पुरस्कार फाव जाल्यात. एक – ब्रह्मानंद शंखवाळकर. दुसरो कोण? (ब्रुनो कुतिन्हो)
मुकेश थळी
फोंडें, गोंय.
No comments:
Post a Comment