परिक्षा ही एक परब... 'कूल'
रावन 'बॅस्ट' मनयात...
गोंय शालांत मंडळाच्या धावी यत्तेच्या परिक्षांक निमणे म्हूर्त मेळ्ळो.
कोरोना दुयेंसाचे फाटभुंयेर परिक्षाय लॉकडावन जाल्ल्यो. मंडळाचे जाळवणदार, पालक, शिक्षक आनी शिक्षणा कडेन संबंदीत सगलेच
नव्या तारखांची उमळशिकेन वाट पळयताले. विद्यार्थ्यांच्या सहनशीलतेचो अंत जावन
तांचो आत्मविस्वास उणावपाची भिरांत तयार जाल्ली. परिक्षा जायत वा ना हाचेरय
शिक्षणीक मळावेले बुदवंत आपले परीन अंदाज उक्तायताले.
आतां 21
मे दिसा सावन
परिक्षा सुरू जातात. हे फाटभुंयेर आमचे प्रधानमंत्री भोवमानेस्त नरेंद्र मोदी हांणी
परिक्षेच्या संदर्भांत कांय प्रभावी विचार विद्यार्थ्यां खातीर मांडिल्ले आसात.
परिक्षे संबंदी मोदी मंत्र-
परिक्षा हो एक खोशयेचो खीण जावंक जाय. वर्सयभर हांवें श्रम घेतल्यात ताचें फळ
दाखोवपाचो आतां वेळ आयिल्लो आसा अशी मानसीकताय विद्यार्थ्यांनी आपणावंक जाय. मजा
आनी उत्साहाचें तें एक पर्व जावंक जाय. परिक्षा म्हणल्यार ‘प्लॅजर’ मानपी भोव उणे
विद्यार्थी आसतले. भोवतेक जाणां खातीर परिक्षा ही एक ‘प्रेशर’ आसता. परिक्षेक
‘प्लॅजर’ मानतले वा ‘प्रेशर’ हाचो निर्णय दरेकल्यान घेवपाचो! जो परिक्षेक ‘प्लॅजर’
मानतलो तो जिकतलो आनी जो परिक्षेक ‘प्रेशर’ मानतलो तो हारतलो. परिक्षा ही एक परब
अशें हांव मानतां. परिक्षा म्हणल्यार एक उत्सव अशे तरेन तिका सामकार वचात. जेन्ना
उत्सव आसता तेन्ना आमचे भितर जें ‘बॅस्ट’ आसता तेंच भायर सरता. समाजाच्या शक्तीचो
साक्षात्कार आमकां उत्सवां वेळारच जाता. जें बऱ्यांतलें बरें आसा तेंच उत्सवाच्या
प्रसंगांनी प्रकट जाता. सर्वसामान्यपणान आमी आमकां बेशिस्त म्हूण मानतात. पूण 40- 45 दीस चलपी कुंभमेळ्याची अस्थायी वेवस्था
पळयली जाल्यार आमी कितले शिस्तप्रिय आनी अनुशासीत आसात हाची गवाय मेळटा. ही
उत्सवांची शक्ती. परिक्षेच्या काळांत पुराय परिवारांत, इश्टां मदीं, आशिकुशीक, सरभोंवतणी उत्सवाचें वातावरण तयार जावंक
जाय. अशें जायत जाल्यारच ‘प्रेशर’ आसा ते सुवातेर ‘प्लॅजर’ निर्माण जातलो.
उत्सवांची उमळशीक आमकां खूब आदीं सावन लागता. हजारांनी लोक उत्सव वांगडा
मनयतात. परिक्षाय हजारांनी भुरगे वांगडा दितात. परबांच्या वेळार केल्ली प्रार्थना
वा केल्ली सांगणी चड फळादीक आसता अशें मानतात. तेच तरेन परिक्षेच्या वेळार केल्लो
अभ्यासय चड फळादीक थारता.
विद्यार्थ्यांक परिक्षेच्या हॉलांत वचपाची ताकतीक लागिल्ली आसता. बेगिनात
बेगीन आपले सुवातेर वचून बसपाची तांकां उमळशीक आसता. ह्यो गजाली कितें ताकतिकेन कर
सारक्यो आसतात?
येरादारीचे
गचीमुडींत सांपडलीं जाल्यारय परिक्षेक वेळार पावतलीं अशे तरेन परिक्षेच्या दिसाचें
नियोजन
विद्यार्थ्यांनी
करपाक जाय. ना जाल्यार असल्या प्रसंगांनी गरजे भायर एक नवो तणाव तयार जाता. आनीक
एक गजाल. आमकां केन्ना केन्ना दिसता की परिक्षेक जापो बरोवंक जो वेळ मेळटा
तातूंतलो बरोचसो वेळ प्रस्न आनी सुचोवण्यो वाचपांतच उलगता. पूण अशें आसना
इश्टांनो. तुमी त्यो सुचोवण्यो बारिकसाणेन वाचूंक जाय. दोन मिणटां, तीन मिणटां, पांच मिणटां वतलीं. कांय हरकत ना. पूण
परिक्षेंत तुमकां कितें करपाचें आसा तें आदींच कळिल्ल्यान तुमची कसलीच गडबड जावची
ना आनी उपरांत पश्चाताप करपाची वेळ येवची ना. आनी देखूनच परिक्षेच्या हॉलांत सुचोवण्यो
वाचपा खातीर लेगीत पांच मिणटां काडप हीं गरजेचीं आसतात.
परिक्षेंतले गूण म्हणल्यार आयुश्य न्हय. परिक्षेचो निकाल म्हणल्यार तुमच्या
हुशारकायेचें प्रमाणपत्र न्हय. तुमच्या जिणेंतलो तो एक म्हत्वाचो टप्पो, इतलेंच! परिक्षा म्हणल्यार सर्वस्व असो समज
पालकांनी आपल्या भुरग्यां मदीं तयार करचो न्हय. परिक्षेंतलें अपेस म्हणल्यार
जिणेंतलें अपेस अशी विद्यार्थ्यांची समजूत करून दिवंक फावना. परिक्षेंत नापास
जाल्ले साबार जाण जिविताच्या परिक्षेंत उंचेल्या गुणांनी पास जाल्ल्याच्यो साबार
देखी आसात.
परिक्षा फकत तुमच्या सद्याच्या स्थितीची मोलावणी करता, तुमच्या पुराय जिविताची न्हय. ते खातीर
‘चील’ रावात. परिक्षेच्या हॉलांत हांसत भितर सरात आनी हांसत भायर सरात. तुमी
वॉरियर (झुजारी) जावंक जाय, वरियर (भित्रे) न्हय. भित्रे मनीस मुखार
पावनात.
आमकां सर्त करपाची आसा ती आमचेच कडेन. म्हज्यांतलें बेस बरें तें दिवपा खातीर
हांव यत्न करतलों ही भावना म्हत्वाची.
'वर्तमान'
ही तुमकां
देवान दिल्ली व्हडली संद. तिचो ‘आतां’ आनी ‘हांगा’ उपेग करात. अभ्यासा खातीर
तंत्रज्ञानाचो आदार घेयात. आयच्या काळांत तंत्रज्ञान हो एक म्हान शिक्षक.
दीसभर अभ्यास करतनाच तुमी कुडीक थोडो विसव दिवंक जाय. तेखातीर योगा सारक्या प्रभावी
साधनांचो आदार घेवं येता. परिक्षेच्या दिसांनी गरजेची न्हीद घेवप सामकी अपरिहार्य.
जो अभ्यास केला तो प्रभावी पणान उत्तरपत्रिकेंत बरयात. परिक्षा हॉलांत
उत्तरपत्रिका दिवन भायर सरतगीच फाटल्यान पळोवप ना, तिचे विशीं चड चिंतप ना. परिक्षेंत कॉपी करप
ही सामकी लजेची गजाल हें मतींत दवरात. ‘कोण तरी जावपा’ खातीर न्हय ‘कितें तरी
करपा’ खातीर शिकात आनी जगात.
वयर मांडल्यात ते विचार आमच्या माननीय प्रधानमंत्र्यांचे. तांणी दिल्ल्या
मंत्रांचो खऱ्यांनीच विद्यार्थ्यांनी सकारात्मक विचार करपाक जाय. गरमी वाडिल्ली
आसली तरी तांणी सांगिल्ले प्रमाणे तकली ‘कूल’ दवरूंक जाय.
मुळांत परिक्षे विशीं भंय आमी बाळगूंकच फावना. प्रचंड तणावा खाला तुमी तुमचो
अभ्यास चालू दवरलो. परिक्षे खातीर तयारी करपाक फाटल्या शतमानांत कोणाकच इतलो वेळ
मेळिल्लो नासतलो. तुमी ते नदरेन सुदैवी!
कोंकणी कवी पुंडलीकबाब नायक आपले एके कवितेंत म्हणटा, 'आमी थोडे उसरां आयले, पूण उसरां येवपी पावसांत आसता तुफानाचें
बळगें'.
परिक्षा उसरां
आयल्या. तुमी तुफानाचें बळगें घेवन तिका सामकार वचात. जैत तुमचेंच आसा.
अनंत अग्नी
मडगांव, गोंय
No comments:
Post a Comment