1992 वर्सा बार्सेलोना शारांत घडून आयिल्ल्या ऑलिम्पीक्सांत 400 मिटर धांवपाच्या प्रकारांत डेरेक रेडमंडस हो ब्रिटीश खेळगडो वांटेकार जाल्लो. त्या ऑलिम्पीक्सांतलें 400 मिटर धांवपा प्रकारांतलें भांगरा पदक ताकाच मेळटलें अशें संवसारांतल्या साबार जाणांचें अनुमान आशिल्लें. ताचें कारण म्हणल्यार ताचे आदीं संवसारीक पांवड्यार घडून आयिल्ल्या भोवतेक सर्तींनी ह्या प्रकारांत ताकाच पयलीं सुवात फावो जाल्ली.
ज्या दिसा ही सर्त प्रत्यक्षांत सुरू जाली तेन्ना एक घडणूक घडली. कांय अंतर धांवले उपरांत डेरेक रेडमंडसाच्या जांगडाची मासपेशी तुटली आनी तो वेदनेन कळवळपाक लागलो. कांय खिणांतच वैजकी आदार दिवपी आपवावुरपी स्ट्रॅचर घेवन मुखार आयले. डेरेक रेडमंडसा कडेन विचार करपाक कांय खिणाचोच वेळ आशिल्लो. कारण इतले मजगतीं वांगडच्या सगल्या धांवपी सर्तकांनी निमणी रेशा हुपिल्ली. डेरेक रेडमंडसान तेय स्थितींत त्या आपवावुरप्यांक परते धाडले आनी तो तसोच कळवळत धांवंक लागलो. इतल्यांत स्टेडियमांतल्यान एक जाणटोसो मनीस थंय आशिल्ल्या सुरक्षा दळाच्या विरोधाची पर्वा करिनासतना मुखार सरलो आनी ताणें डेरेक रेडमंडसाक ते स्थितींत धांवतले कडेन आपलो आदार दिलो. त्या मनशाच्या आदारान डेरेक रेडमंडसान निमणी रेशा हुपली तेन्ना स्टेडियमार उपस्थीत आशिल्ल्या पासस्ट हजार लोकांनी ताका उबे रावन मानवंदना दिली.
डेरेक रेडमंडस तर हे सर्तींत निमण्या सुवातेर आयिल्लो. ताका कसलेंच पदक फावो जावंक नाशिल्लें. मागीर लोकांनी ताका उबे रावन मानवंदना दिवपाची कितें गरज आशिल्ली? आयज सत्तावीस वर्सां उलगलीं तरी डेरेक रेडमंडस लोकांच्या काळजांत कित्याक आसा? कित्याक लागून डेरेक रेडमंडसाची ही काणी संवसारांतल्या कोट्यांनी लोकांक प्रेरणा दीत आयल्या?
कारण, सर्तींत पयली सुवात म्हत्वाची न्हय तर मुखार दवरिल्ली मोख म्हत्वाची हें त्या दिसा डेरेक रेडमंडसान दाखोवन दिलें. आपले खातीर पदक मेळचें परस परिस्थिती प्रतिकूल आसतनाय निमणी रेशा हुपप म्हत्वाचें ही देख ताणें त्या दिसा घालून दिली. आपली सर्त हेरां कडेन न्हय तर स्वताच कडेन आसता हो आदर्श ताणें संवसाराक दिलो.
त्या दूख दिण्या खिणाक ताका स्टेडियमांतल्यान ट्रॅकार येवन आदार दिवपी ‘तो’ कोण आशिल्लो जाणात? तो आशिल्लो ताचो बापूय. आयज अशे डेरेक रेडमंडस आनी आपल्या भुरग्याक प्रतिकूल परिस्थितींत मोलादीक नैतीक आदार आनी बळगें दिवपी पालक सपासप मेळनात!
भुरगेपणांतच आमी इनामांचें व्यसन भुरग्यांक लायतात. फुडाराक मागीर भुरगीं इनामां मेळ्ळीं ना जाल्यार निराश जातात. भुरग्यां परस पालकांकच चड त्रास जाता अशें चित्र भोवतेक वेळार अणभवपाक मेळटा. आपल्या भुरग्याचेर कसो अन्याय जाला हें दाखोवंक परिक्षक कशे चुकल्यात आनी आयोजक कशे नालायक हें दाखोवंक तांची मागीर सर्तच लागता. नकळत ही वृत्ती भुरग्या मदींय तयार जाता हें पालक विसरता.
आमच्या रवीन्द्र केळेकार ज्ञानमंदीरांत आमी एक प्रयोग केलो. सर्तींत पयल्या तीन क्रमांकांचीं इनामां दिवप ना. ताचे बदलाक सर्तींत वांटेकार जातल्या दरेकल्याक एक प्रमाणपत्र आनी ल्हानशीच भेट दिवप अशी रीत सुरू केली. हें करतना सर्तकांचो आंकडो उणो जावं येता, सर्तीचो सादरीकरणाचो दर्जो उणो जावं येता अशी भिरांत आशिल्ली. पूण तशें जालें ना. इनामांचो भंय नाशिल्ल्यान भुरगो मेकळेपणान सादरीकरण करता आनी प्रमाणपत्र आनी चकचकीत कागदांत गुटलायिल्ली एखाद्री भेट खात्रीन मेळटा देखून विद्यार्थी व्हडा संख्येन सर्तींत वांटेकार जाता असो अणभव घेवंक मेळ्ळो. सर्त नाशिल्ल्यान ते एकामेकांक सादरीकरणांत आदार करतात हेंय पळोवंक मेळ्ळें. इनामांच नात म्हणगीच मेळिल्ल्या इनामांक लागून केन्ना केन्ना तयार जावपी अहंकार आनी फाजील विस्वासय ना. इनामांच नाशिल्ल्यान भुरग्यां-भुरग्यां मदीं नाका आशिल्ली दुस्मानकाय आनी दुस्वासय ना. फकत उरता ती ‘म्हजी सर्त म्हजेच कडेन' ही भावना.
भुरग्याच्या सृजनांत वा शिक्षणांत उंचेल्या क्रमांका परसय गुणात्मक वाड जावप चड गरजेची आसता. आपल्या भुरग्याक कालचे परिक्षेंत शेंकड्यांतले णव्वद गूण पडिल्ले आनी तो दुसरे सुवातेर आयिल्लो आनी आयज ताका अंयशीं गूण मेळूं पूण ताचो क्रमांक पयलो आयला हातूंत समाधान मानपीच पालक चड. भुरग्यांच्या तांकीक धरून गुणात्मक आनी संख्यात्मक वाड म्हत्वाची हें भोवतेक पालकांक होलमना.
म्हजो इश्ट प्रशांतबाब नायक आपले धुवेक दरेका सर्ती उपरांत इनाम म्हूण एक पुस्तक भेट दिता. एक सादीच पूण भुरग्याक उर्बा दिवपी ही कृती. पालकांचो आपल्या कर्तुबाचेर इनामांच्याय मुखार वचून विस्वास आसा म्हणपाची भुरग्याक आशिल्ली खात्री. अश्या प्रसंगांतल्यान भुरग्याची सृजनशिलता सहजपणान फुलता. ताचो आत्मविस्वास वाडटा.
एखाद्रे सर्तींत आपलो भुरगो सादरीकरणांत कमी पडटा तेन्ना ताका पालक वा शिक्षक ह्या नात्यान आत्मविस्वास दिवपाची गरज आसता. तो खंय चुकला आनी सुदारपा खातीर ताणें कितें यत्न करपाक जाय तें योग्य रितीन सांगप म्हत्वाचें आसता. चूक ही खिणयाळी, शिकप आनी सुदारप सासणाचें हें ताका पटोवन दिवपाक जाय.
सकाळ सांजवेळ आमी ताची सावळी जावन ताचे फुडल्यान-फाटल्यान रावया. पूण भर दनपारच्या वताकडार जेन्ना तो रखरखत्या सुर्या खाला आसतलो तेन्ना ताका घडये आमची सावळी दिसची ना पूण आमचें अस्तित्व जाणवतलें आनी तीच ताची स्फूर्त थारतली हाची जतनाय घेवया.
आयच्या काळांत सर्त म्हत्वाचीच, पूण ती आपलेच कडेन हो आदर्श घालून दिवपी डेरेक रेडमंडस आमी घडोवया... आनी ते खातीर डेरेक रेडमंडसाच्या बापायचो आदर्श आमचे नदरे मुखार दवरया.
No comments:
Post a Comment