भुरग्यांची परिक्षा सोंपत आयल्या आनी शिंयाळ्यांतली सुटी लागीं पावल्या. सुटयेंत कितें कितें करप ताची तयारी भुरगीं आपआपल्या मनांत करपाक लागल्यात. कांय भुरगीं तर थारावनूय जाल्या आसतलीं. कोण मामाल्या घरा, कोण मावशेल्या घरा, कोण काकाल्या घरा वचपाचीं सपनां रंगोवंक लागल्यात आसतले. कोणाक चित्रकला करपाक जाय आसतले तर कोणाक नाच. कोणाक गावपाक शिकपाक जाय आसतले तर कोणाक नाटक. भुरग्यांक सुटी पडटली म्हूण साबार सरकारी, बिगर सरकारी आनी खासगी संस्था कार्यावळी, शिबिरां आयोजीत करतात. तातूंत 5 ते 6 दिसांची शिंयाळी शिबिरां चड प्रमाणांत जातात. भुरग्यांक आवडपी नाच, गायन, काणी, नाटक अश्या वेगवेगळ्या विशयांचेर शिबिरां जातात. अशेच तरेन मडगांवची अभिनव क्रियेशन्ज संस्था फाटल्या चार वर्सां सावन मज्जा शिबीर आयोजीत करता.
साहित्य अकादेमी युवा पुरस्कार जैतीवंत अन्वेषा सिंगबाळ आनी गोंयचो नामनेचो फोटोग्राफर अमोल कामत हांणी संयुक्तपणान 2015 वर्सां अभिनव क्रियेशन्ज ही संस्था स्थापन केली. सुरवात तांणी पुस्तक प्रदर्शनांतल्यान केली. ते उपरांत तांणी एका म्हत्वाच्या उपक्रमाक हात घालो. तो म्हणल्यार ल्हान भुरग्यां खातीर मज्जा शिबीर. ऑक्टोबर आनी मे म्हयन्याच्या सुटयेंत 4 ते 10 वर्सां पिरायेच्या भुरग्यां खातीर मडगांवां मज्जा शिबीर जाता. मडगांवच्यान सुरू जावन आतां हीं शिबिरां फोंडें, म्हापशें सारकिल्या वाठारांत लेगीत जातात. भुरग्यां खातीर काणी, कविता, चित्रकला, क्राफ्ट, नाटक, माती काम, विज्ञान ह्या विशयांचेर शिबिरांत मार्गदर्शन मेळटा. शिबिराचें नांव मज्जा, म्हणल्यार शिबिरांत मज्जाच मज्जा आसता. भुरग्यांक जाता तितली मजा करूंक मेळची, तांकां खोस मेळची, नवे इश्ट मेळचे, एकामेकां कडेन उलोवंक मेळचे आनी कसल्याच दबावा शिवाय कांय दीस फकत उमेदीन नवें शिकपाक मेळचें हो ह्या शिबिराचो उद्देश.
शिबिराच्या निमतान अनवळखी मनशांक आपलें भुरगें दिवप पालकां खातीर खूब कठीण. पूण भुरग्यांच्या जिवितांत अश्यां शिबिरांचें म्हत्व समजून घेवन पालक आपल्या भुरग्यांक गिमाळ्यांत आनी शिंयाळ्यांत शिबिरांनी धाडटात. मज्जा शिबिराचो अणभव हांवें घेतला. भुरग्यांचें व्यक्तीमत्व घडोवपाक, आत्मविश्वास वाडोवपाक आनी मजेंतल्यान आनी कसल्याच बंधना शिवाय शिकूंक हे शिबीर भुरग्यांक मजत करता अशें म्हाका दिसता. भुरग्यां भितर गोंयच्या संस्कृतायेची आनी प्रादेशीक भाशेची बीं रुजोवपाचें काम अभिनव क्रियेशन्ज करतना दिसता.
मज्जा शिबिरांक भुरग्यांचो उपाट प्रतिसाद आनी तांची उमेद अणभवून अभिनव क्रियेशन्जान मडगांवां मज्जा स्कूल ऑफ जॉय सुरू केला. ह्या केंद्राचेर भुरगीं आनी व्हडल्यां खातीर संगीत, नाच, कथाकथन, चित्रकला, नाटक, कविता, हस्तकला, योग अश्या साबार विशयाचेर वर्ग चलतात. आनंददायी वातावरणांत भुरग्यां खातीर हे वर्ग चलतात. कलेच्या माध्यमांतल्यान भुरग्यांच्या कलागुणांक वाव दिवप आनी तांचें व्यक्तीमत्व घडोवपाचें काम अभिनव क्रियेशन्ज करता.
शिकपा खातीर पिराय लागना आनी शिकतात तितले उणें. हें तत्व मानपी अभिनव क्रियेशन्ज ल्हान आनी व्हडल्यां खातीर डिकुपेज, डॉट पेण्टींग सारकिल्यो कार्यशाळा नेमान आयोजीत करतात. गोंयच्या सणां-परबां निमतान खास कार्यशाळांचें आयोजन ही संस्था करता. कागदा पसून फुलां तयार करप वा पणट्यो आनी आकाशदिवे तयार करप ह्या सारकिल्यो कार्याशाळा तांणी घेतल्यात. कार्यशाळां खातीर वयाची मर्यादा आसना. शिकपाची इत्सा आशिल्ल्यां खातीर ह्यो कार्यशाळा आसतात. मज्जा स्कुलांत लेगीत नाच, संगिताचे वर्ग घेवपी 60 वर्सा पिराये मेरेनचे लोक आसात. अभिनव क्रियेशन्जान ह्या वयस्क लोकांक एक नवें दार उकतें करून दिला.
अभिनव क्रियेशन्जान एक पावल मुखार व्हरत भुरग्यां खातीर कोंकणी पुस्तकां प्रकाशीत करपाक सुरू केला. काणुल्यो हें काणयांचें संकलीत पुस्तक, नामनेची लेखक रत्नमाला दिवकार हांणी बरयिल्लीं बाल स्टेशन हें नाटकुल्याचें पुस्तक, अबड चबड आनी शणटूर पणटूर हीं आप-उलोवपांचीं पुस्तकां, म्हाका दोतोर जावंक जाय हें भारतांतल्या पयल्या दोतोरांचेर पुस्तक, हीं पुस्तकां तांणी आतां मेरेन प्रकाशीत केल्यात. भुरगीं आनी पालकां कडल्यान पुस्तकां विशीं सेगीत मेळिल्ल्या प्रतिसादांतल्यान तांणी हीं पुस्तकां काडल्यात.
पुस्तक प्रकाशना सांगाताच अभिनव क्रिएशन्स नेमान साहित्या संदर्भांत कार्यावळी घडोवन हाडटा. पुस्तकांचेर चर्चा, साहित्य सादरीकरण, लेखकांची मुलाखत, नाट्य सादरीकरण अश्या तरेच्यो कार्यावळी तांच्या मडगांवच्या केंद्राचेर जातात. ह्यो कार्यावळी दर म्हयन्यांत घडोवन हाडपाचो तांचो हांवेस आतां फळादीक जावपाक लागिल्लो दिसता.
शिबिरां आनी कार्यशाळा भायर अभिनव क्रियेशन्ज पयली सावन भुरग्यां खातीर पुस्तक प्रदर्शनां आयोजीत करतात. 2015 वर्सा सावन तांणी पेडणें, म्हापशें, दिवचल, पणजे, वास्को, मडगांव, केपें, सांगें, काणकोण ह्या भागांनी पुस्तक प्रदर्शनां आयोजीत केल्यात. कोंकणी, मराठी, हिंदी आनी इंग्लीश ह्या भासांतलीं पुस्तकां प्रदर्शनांक आसतात. काणयो, कविता, कादंबरी, व्याकरण, आप-उलोवपां, नाटकुलीं आनी हेर साहित्य प्रकारांचीं पुस्तकां तांचे कडेन उपलब्ध आसात. अभिनव क्रियेशन्जान स्वता प्रकाशीत केल्लीं पुस्तकां तशेंच गोवा कोंकणी अकादेमी, कोंकणी भाशा मंडळ, संजना पब्लिकेशन्स, बिंब प्रकाशन आनी गोंयच्या हेर प्रकाशन संस्थांचीं पुस्तकां विक्री खातीर आसतात. महाराष्ट्रांतल्या ज्योत्ना प्रकाशन आनी मेहता पब्लिकेशन्सांचीं मराठी पुस्तकां, नवी दिल्लीच्या एन.सी.ई.आर.टी आनी भोपाळच्या इकतारा पब्लिकेशन्साचीं हिंदी पुस्तकां, नवी दिल्लीच्या प्रथम बुक्साचीं हिंदी आनी इंग्लीश पुस्तकां तशेंच रुपा पब्लिकेशन्साचीं इंग्लीश पुस्तकां तांचे कडेन उपलब्ध आसात. गोंयचें आनी गोंया भायले हेर भाशेंतलें साहित्य पळोवपाची एक बरी संद अभिनव क्रियेशन्ज भुरग्यांक दिता.
भुरगीं वाचनात अशें खूब फावटी आयकूंक मेळटा. अभिनव क्रियेशन्जाच्या पुस्तक प्रदर्शनाक वचून पळयात. भुरग्यांच्यो कश्यो गिट्ट्यो पडटा. हातांत 50 वा 100 शंबरांच्यो नोटी हाडून भुरगीं उमेदीन सगळीं पुस्तकां चाळटात आनी आपल्याक जाय तें पुस्तक घेतात. पुस्तकाचो दर आपल्या कडेन आशिल्ल्या पयशा परस चड आसल्यार भुरगीं कशी निराश जातात तेय ह्या प्रदर्शना वेळार पळोवंक मेळटा.
कांय फावटी भुरग्यान निवडिल्लें पुस्तक पालकांक मान्य आसना. भुरग्यान एका काणयेचें पुस्तक घेतल्यार पालक ताका तें पुस्तक दवरून 10 वा चड काणयो आशिल्लें पुस्तक घेवंक सांगता. कोंकणी पुस्तक घेतल्यार मराठी वा इंग्लीश पुस्तक घेवंक सांगता. काणयेचें पुस्तक घेतल्यार तांकां निबंधाचें पुस्तक घेवपाक लायतात. आमी मुळांत भुरग्यांच्या क्षमतेचेर विश्वास दवरनात. भुरग्यांक पुस्तकां निवडूंक कळना हे जशे की आमी थारायल्लेच आसा. अभिवन क्रिएशन्साच्या पुस्तक प्रदर्शना वेळार मेळिल्ले हे अणभव.
पूण तेच बरोबर कोंकणी, मराठी आनी हेर भासांतली भुरग्यांचीं काणयांचीं पुस्तकां सोदून विकत घेवपी पालकूय आसात. पुस्तकाचेर भरभरून खर्च करून तातूंतल्यान अर्थीक फायदो न सोदपी पालकूय ह्या प्रदर्शनांनी दिसतात. हीं पुस्तक प्रदर्शनां पळोवन म्हाका खूब समाधान दिसता आनी आशावाद दिसता. भुरग्यांक वेगवेगळ्या शैलींतलीं पुस्तकां आनी वेगवेगळें साहित्य प्रकार दिल्यार तीं पुस्तकां वाचतात, चित्रां तोखेतात. तांची कल्पनाशक्त वाडटा. गरज आसा ती फकत तांच्या मेरेन पुस्तकां पावोवपाची.
अभिनव क्रियेशन्ज ही गोंयच्या संस्कृताये कडेन जोडिल्ली संस्था अशें म्हाका दिसता. ही संस्था गोंयची कला आनी भास हांचे संवर्धन करपाचें काम आपल्या परीन करता. वेव्हारा बरोबर आपली सामाजीक जापसालदारकी समजून हे संस्थेचे पदाधिकारी काम करतना दिसता. भुरग्यांक नदरे मुखार दवरून ते वेगवेगळे प्रयोग करतात. पूण भुरग्यांच्या खोशये कडेन ते कसलीच तडजोड करनात. भुरग्यांक प्रादेशीक भाशे कडेन जोडपाचें काम अभिनव क्रियेशन्ज करता.
अभिनव क्रियेशन्जाची देख सगळ्यांनी घेवची. पुस्तक प्रदर्शनां ग्रामीण भागांनी चडांत चड जावची. मज्जा सारकिलीं शिबिरां गोंयच्या गांवगिर्या वाठारांनी जावचीं आनी गांवांतल्या भुरग्यांकूय कला आनी साहित्याच्या मळार संद मेळची. भुरग्यांच्या विश्वांत आनिकूय भर पडची अशें आंवडेतां.
No comments:
Post a Comment