आयज लॉकडावन, फाल्यां कितें? - अॅड. हृषिकेश कदम

दुसरें संवसारीक झूज जेन्ना सोंपलें. तेन्ना संवसाराची लागीं लागीं 3 ते 4 टक्के लोकसंख्या उणी जाली. सुमार 8 ते 8.5 कोटी लोकांक मरण आयिल्लें. आतां हो सरकारी आंकडो कितलो खरो आनी कितलो फट आमी नकळो. संवसार आयज तिसऱ्या संवसारीक झुजा पांवड्यार आसा. आनी हें झूज झुजपाक सैनीक आनी आर्मांची गरज ना. सगळो संवसार, सगळी मनीसजात सैनीक आनी सगळी बायो टॅक्नाॅलाॅजी हीं आमचीं अस्त्रां. ह्या जीवघेण्या विशाणू आड लडटना आतां मेरेन कितल्याश्याच लोकांक मरण आयलां.       

फाटलो इतिहास पळयलो जाल्यार मनीस जातीन दरएका अरिश्टाचेर जैत जोडलां आनी तें करतना खूप कितें व्हगडायलांय बी. ह्यावूय दुयेंसाक आमी स्पॅनीश फ्लू, एशियन फ्लू, रुस फ्लू, लंडन प्लेगा भशेनूच मात करून फुडें पावल घालतले आनी दरखेपे करतात तीच चूक हेवूय खेपे करतले. फाटल्यान आमी कितें सोडलां आनी सांडलां ताचें मोल कितें हें सोदून काडपाक अपेशी थारतले.      

जेन्ना हांव मोल सोदून काडपा विशीं उलयतां तेन्ना तें अर्थीक मोल निश्चीतूच न्हय. तें मोल करपाक मनीस जात सामकी फुडें कोरोना व्हायरस पातळपाक सुरवात जाले उपरांत आमी भारत, चीन, अॉस्ट्रेलिया देशांचें लॉकडावना विशीं आयकलें. फकत इतलेंच न्हय जाल्यार लॉकडावनाचो परिणाम अर्थवेवस्थेचेर कसो जातलो तेंवूय वाचलें. बीबीसीच्या अहवाला प्रमाण संवसारांतल्यो मुख्य बाजारपेठो 22 ते 28 टक्क्यां सकयल आसात. हें संवसारीक मंदी परस चड आसा म्हणून लक्षांत येता. डॉट कॉम बबल, सब प्रायम क्रायसीस, ब्लॅक मंडे हे सगळे मंदीचे काळ आमी मार्च म्हयन्यांत हुपले आनी ताचेकूय 2 टक्के सकयल वचून आमी रावल्यात आनी कांय अर्थतज्ञां प्रमाण ही फकत सुरवात. आतां हीच सुरवात जाल्यार फुडें कितें.       

भारतांत बेरोजगारीचो आंकडो वाडिल्लोच आनी तो दर वर्साक 1.2 टक्क्यान वाडटा. कारण आमची लोकसंख्या वाडटा. पूण त्या व्हायरसाक लागून पुराय देश बंद पडला. खंयचोच वेवसाय चलना. अश्या वेळार दिसवड्याचेर कामाक आशिल्ल्या लोकांनी आपापल्या गांवची वाट धरल्या. आतां मेरेन भारतांत 8.7 टक्के लोक बेरोजगार आशिल्ले. पूण एप्रील 7 तारखेचो आंकडो भिरांकूळ आशिल्लो. वट्ट बेरोजगारी 23 टक्के जाल्ली आनी हो फकत पयलो पांवडो. सरकारान कोणाकूच कामा वयल्यान काडचे न्हय म्हणून आदेश दिला आनी कंपनी ताका पाळो दितात. जे लोक दिसवड्याचेर कामाक आसात आनी ल्हान सान काम करताले तांचे हाल जावपाक लागल्यात. पूण हेर अास्थापनां कितलो तेंप अर्थीक ताण सोंसपाक शकतलीं. लोकांच्या मनांत निर्माण जाल्लो भंय वचपाक खूप वेळ लागतलो आनी ते मेरेन कांयच सुरळीत जावपाचीं चिन्नां दिसनात फकत अमेरिकेंत आतां मेरेन 60 लाख लोकांच्यो नोकऱ्यो गेल्यात.       

पर्यटन वेवसाय जाल्यार आनीक एक वर्स मेरेन तरी सुरू जायतसो दिसना. 100 वयर देशांनी आपलीं दारां बंद केल्यांत. दिसाक सर्वसादारण 1,80,000 विमानां उडटालीं आतां तीं 40,000 चेर आयल्यांत आनी तिंवूय फकत सामान आनी वखदांची येरादारी करपी.       

सगळ्या संवसारांत वाहनांचो खप 86 टक्क्यांनी देंवला आनी तेलाचें मोल 2000 वर्सा आशिल्लें तितलें जालां. अश्या वेळार येता त्या वर्सा संवसाराची अर्थीक प्रगती 1 ते 1.5 टक्क्यान जातली असो अदमास आसा आनी ही प्रगती फकत शेती आनी नुस्तेमारी आनी हेर खाणा-जेवणाच्या वेवसायांत जातली अशीं चिन्नां दिसतात.       

फाटल्या दिसांनी सहज म्हणून म्हजा एका काणकोणच्या इंजिनीयर इश्टाक फोन केलो. तो खोतीगांवचो. उलयतां उलयतां आबाची खबर घेतली. तेन्ना म्हज्या इश्टान म्हाका सांगलें, तें सामकें दुखदिणें आशिल्लें. तो म्हणटा आबाक फरक पडना. तो सदचे वरीं सकाळीं उठ्ठा दूद काडटा, पोरसांत काम करता, गोरवांक चरपाक व्हरता, पेजेक येता. परत वता. सांजे वायंगण शेत पळयता, उदक शिंपता, भाटान माडांक आळें करता आपली विडी स्वता वळटा, आेडटा आनी सांजे घरा येवन हांव न्हिदून आसा तें पळोवन, तुमी शिकून वाट लायल्यात अशें म्हणून तापता.       

एके वटेन आबाच्या उतरांचेर हांसपाक येता. पूण चड चिंतलें जाल्यार आबाच्या उतरांनी भांगर लिपलां अशें दिसता. त्या मनशान आयजवेर स्वताक जाय तितलेंत पिकोवन खालां. सैमाचेर अत्याचार केलो ना. वयल्यान आपले कडन चड पिकता तें लोकांक विकून गरजे पुरतें पयशे जाेडल्यात. नीड आनी ग्रीड हातूंत खूब फरक आसा. पूण नीड केन्ना ग्रीड जाता हें सोदपाक भोव कठीण. ती बारीक रेग मनीस केन्ना हुपता हें स्वता ताकाच कळना आनी तो उपभोगी जावन व्हांवत वता. पूण आबा सारकिल्यांक हें बेस बरें जमलां. आतां नोकरेक लागून 5 वर्सांत लग्न जावन 10-12 लाखांची मोटार घेवपी म्हजो इश्ट गिरेस्त काय आपले गरजे पुरतें पिकोवन खावपी ताचो आबा.       

मारून खावपी जमाती सावन सैम पुजपी, मागीर राजाक पुजपी, मागीर देवांक पुजपी आनी दुसऱ्या संवसारीक झुजा उपरांत उदारमतवाद (लिब्रलीझम) असो प्रवास करीत आशिल्ली मनीस जात आतां कितें करतली. ह्या तिसऱ्या संवसारीक झुजांतल्यान कितें शिकतली.       

ज्या वेगान बायो टॅक्नॉलॉजी प्रगती करता तें पळयल्यार आमी आबा भशेन परत सैम पुजपी जायत अशें तरी दिसना. आनी आयज स्वताच्या आंगान इलॅक्ट्रोइस घालून स्वताच्या जिवनाचो ताबो एका संगणकाक दितात. आमच्या रक्तदाबाचो, खाणा-जेवणाचो सगळो ताबो फिटबीट सारक्या कंपनींक दितात. आमकां कितें वाचपाक आवडटा, खंयची पदां आवडटात ही म्हायती अॅमेझोनाक दितात. मागीर आमचे कुडीचोय ताबो खंयचे एके बायो टॅक्नॉलॉजी कंपनीक दिवप कितें वायट आसा. नॉनोबॉटसाक करूं दी मागीर आमचे प्रतिकार शक्तीचो,  रक्तदाबाचो आनी काळजाचो हुस्को. पूण सगळीच जीण अशी टॅक्नॉलॉजीक दिवन चलत. आतां विशाणू जाल्यार फुडाराक सॉफ्टवॅर व्हायरस. कोण ना कोेण, केन्ना ना केन्ना तरी फाटीक लागतलोच. आतांच आमी आमचे जिणेचो रिसॅट बटन दामला अशें म्हाका दिसता आनी आमचे कडेन निर्णय घेवपाक, बसून चिंतपाक खूब वेळूय आसा. अश्या वेळार आमी कसलो निर्णय घेतले.     

 

अॅड. हृषिकेश कदम