व्हिडियो निर्मितीची मोट्या आवाठाची प्रक्रिया - स्नेहा सबनीस

फिल्म, वॅब सिरीज हांचो आमचे जिणेचेर मोटो प्रभाव पडला. प्रभावशाली कल्पना मांडपाक, गिन्यान वाडोवपाक व्हिडियोचो चड प्रमाणांत वापर जाता. व्हिडियोच्या शक्तिशाली माध्यमाचो साक्षात्कार आमकां हाली तेंपार जाला. जायत्या जाणांनी सर्जनशीलतायेन भरिल्लें हें साधन आपणायलां. नवकल्पक व्हिडियो आमच्या मुखार येवपाक लागल्यात. मनरिजवण करपी तशेंच गिन्यान वाडोवपी व्हिडियो तयार जाल्यात. 

व्हिडियो निर्मुपा खातीर एक कला लागता. श्रम घेवचे पडटात. व्हिडियो तयार करतना प्रेक्षकांचो दृश्टीकोण नदरे मुखार दवरचो पडटा. तांच्यो आवडी-निवडी लक्षांत घेवच्यो पडटात. विशयाचो सखोल अभ्यास करचो पडटा. जे गजालीचेर व्हिडियो तयार करतात ताची म्हायती एकठांय करून जे भाशेंत व्हिडियो तयार करतात ते भाशेच्या सभावांत ती हाडची पडटा. सगळी म्हायती मेळ्ळ्या उपरांत व्हिडियो खातीर कितें योग्य आनी कितें अयोग्य तें थारावन संहिता (स्क्रिप्ट) तयार करची पडटा. निमणो व्हिडियो कसो जातलो हाचें मुळावण हे संहितेंत आसता.

व्हिडियोची संकल्पना आंखप हेंवूय तितलेंच म्हत्वाचें. वेळ कितलो आसतलो, 6 सेकंदांचो ल्हान व्हिडियो काय अर्दवर ते एक वराचो लघुचित्रपट तें थारावचें पडटा. व्हिडियोचो दर्जो सांबाळचो पडटा. सुरवातच घसघशीत आनी लक्षवेधी आसल्यार प्रेक्षक पुराय व्हिडियो पळोवपांत गुंतून वतात. 

व्हिडियोची संकल्पना आनी स्क्रिप्ट थारल्या उपरांत ताचो वॉयस ओवर म्हणल्यार आवाज रिकॉर्ड करप जाता. आवाजांतलो चड-उतार, गती तपासची पडटा. भुरग्यां खातीर व्हिडियो करतना हें लक्षांत दवरप खूब म्हत्वाचें. आवाज खूब सवकास आसल्यार भुरगीं वाजेतलीं. आवाजाची गती चड नेटान आसल्यार कितें उलयलां तेच कळचें ना. आवाजा सयत उच्चारण तितलेंच म्हत्वाचें. उच्चार स्पश्ट आनी स्वच्छ आसपाक जाय. पणजे आकाशवाणी केंद्राचेर काम करतना अनुवादक आनी लेखक मुकेश थळी हांचीं उतरां अजुनूय म्हाका घट्ट याद आसात. “दुसर्‍याक मनशाक आपणे कितें सांगलें ते स्पश्ट कळटा अशे तरेन तें उलोवचें. बातमी आयकतना ती घडणूक दोळ्यां मुखार दिसता इतली शक्त आवाजा भितर आसता.”

आवाज रिकॉर्ड करपाक खास मायक मेळटात. पॉडकास्ट करतना ह्या मायकाचो वापर जाता. पूण हें जालें वेवसायीक पांवड्यार. घरांत बसून व्हिडियो तयार करतना कांय ॲप उपेगाक पडटात. कम्प्युटरा खातीर ऑडियो वा सावंड रिकॉर्डर सॉफ्टवॅर आनी मोबायला खातीर ॲप मेळटात. हेडफोन वापरून ताचेर सोंपेंपणान आवाज रिकॉर्ड करूं येता. पूण हेर कसलोच आवाज रिकॉर्ड जायना हाची खात्री करची पडटा. मावसाच्या क्लिकाचो आवाज लेगीत सावंड रिकॉर्डरांत रिकॉर्ड जाता. कांय वेळार आवाजाचो प्रतिध्वनी रिकॉर्ड जाता. ट्रायल म्हूण आवाज रिकॉर्ड करून पळोवप सदांच बरें. पुराय स्क्रिप्ट घडाघड वाच्च्या परस ल्हानसो विसव घेवन आवाज रिकॉर्ड करप बरें. रिकॉर्डरांत आशिल्लो पॉज बटण हाका बर्याचक पडटा. इल्लोसो आवाज रिकॉर्ड केलो, उदक पिलें, विसव घेतलो जाल्यार आवाजाची गती, नेट आनी चड-उतार सांबाळपाक मेळटा. 

व्हिडियो भितर टॅक्स्ट म्हणल्यार लिखीत मजकूर दिल्यार व्हिडियोक आनीक सोबाय, उठाव येता. देखीक, एका पदाचेर व्हिडियो तयार करतना त्या गिताचो मजकूर व्हिडियोंत दिवं येता. खास करून भुरग्यां खातीर टॅक्स्ट आशिल्ले व्हिडियो तयार करप सदांच बरें. एक जतनाय म्हत्वाची. शुद्धलेखन तपासून टॅक्स्टाचो आसपाव करप. राजहंस वितरणाचो कोंकणी-इंग्लीश शब्दकोश, कोंकणी भाशा मंडळाचो ऑनलायन शब्दकोश ॲप हांची मजत घेवं येता. 

वेगवेगळे सॉफ्टवॅर आशिल्ल्यान, देवनागरी लिपयेंत टॅक्स्ट टायप करपाक कांय आडमेळीं येतात. पूण युनिकोड ह्या युनिवर्सल कोडेड कॅरॅक्टर सॅटाक लागून कम्प्युटराचेर देवनागरींत टंकलेखन करप सोंपें जालां. दरेकल्याच्या कम्प्युटराचेर कण्ट्रोल पॅनलांत, रिजन एण्ड लँग्वेज सॅटिंग्सांत कोंकणी भास मेळटा. इन्स्क्रिप्ट किबोर्डाच्या आदारान कोंकणींत टायप करूं येता. हाचे भायर गुगल इंडीक किबोर्ड, लिपिकार हीं ऑनलायन सॉफ्टवॅर मेळटात. मोबायलाचेर देवनागरी टायप करूंकगुगल इंडीक किबोर्डाचो चड आदार जाता. 

व्हिडियो तयार करता म्हणल्यार फोटो आनी व्हिज्युवल्स आयलेच. तातूंत सतार वा पियानो वादन आशिल्लें पार्श्वसंगीत घाल्यार व्हिडियो आनीक रंगतदार जाता. फोटो आनी व्हिज्युवल्स निवडटना ताचेर वॉटरमार्क वा कसली खूण आसा जाल्यार पळोवची पडटा. रॉयल्टी फ्री, कॉपीरायट नाशिल्लें संगीत आनी व्हिज्युवल्स वा फोटो जायत्या संकेतथळांचेर मेळटात. तातूंतलीं कांय संकेतथळां म्हणल्यार www.pexels.com, www.pixabay.com, www.videvo.net आनी हेर. युट्युबाचेरय व्हिडियो आनी रॉयल्टी फ्री संगीत मेळटात. पूण दुसर्‍यालें संगीत वा व्हिज्युवल्स वापरतना त्या व्यक्तीचो आसपाव आदारावळांत केल्यार चड बरें. 

    कांय वेळार फोटो डावनलोड जायनात वा फोटो भितरलो अमूक भाग आमकां जाय आसता. फोटो एडिटिंग करूंक पेण्टाचो आदार जाता. पेण्ट आमच्या सगळ्यांच्या कम्प्युटरांत आसताच. हालींच गोंयची आयटी तज्ञ संगिता नायक हांणी इरफान विव ह्या एका सॉफ्टवॅराची वळख करून दिली. हो सॉफ्टवॅर खूब उपेगाचो. प्रिण्ट स्क्रीन करून ह्या सॉफ्टवॅरांत फोटो एडीट करूंक मेळटा. मोबायलाचेर फोटो एडीट करूंक टॅक्स्टाग्राम वा हेर फोटो एडिटिंग ॲप मेळटात. 

    आतां येता सगळ्यांत म्हत्वाचो पांवडो. व्हिडियो तयार करपाक लागपी ॲप वा सॉफ्टवॅर. इडियस, एडॉब प्रिमियर ह्या सॉफ्टवॅरांचो वापर वेवसायीक पांवड्यार जाता. पूण साद्या सोंप्या रितीन व्हिडियो संपादन करूंक ओपन शॉट व्हिडियो एडिटर, ओबिएस स्टुडियो हे सॉफ्टवॅर वापरतात. तशेंच विटा ॲप, इनशॉट, युकट ह्या ॲपांचो मोट्या प्रमाणांत वापर जावपाक लागला. एमएस ऑफीस पावरपॉयंट सादरीकरणाच्या आदारान एक बेस बरो व्हिडियो तयार करूं येता. व्हिडियो संपादन करतना टॅक्स्टाचो रंग दिसता असो दवरप, व्हिज्युवल्साक इफॅक्ट्स घालप, फोटोची गती सांबाळप, फोटो वा व्हिज्युवल्साचो आकार सांबाळप ह्यो गजाली मतींत घेवच्यो पडटात. एक व्हिडियो लोकां मुखार दवरचे आदीं ताचेर हेरांचें मत घेवप आनी तो भौशीक पांवड्यार घालपा योग्य आसा काय ना ते जाणून घेवपूय तितलेंच म्हत्वाचें.  

व्हिडियो करतना साहित्य ते संपादन मेरेन सुयोग्य समतोल राखचो पडटा. तेन्नाच प्रेक्षक तो पुराय व्हिडियो आवडीन पळयतले. प्रेक्षकांक दरेका सेकंदाक खिळोवन दवरपाचो जादू हो आशय, विशय, भितल्ल्यो प्रतिमा, पार्श्वसंगीत आनी निर्मात्या पंगडाचें सुसुत्र कसब हाचेर पातयेवन उरता. 

स्नेहा सबनीस

सांखळी, गोंय.