अभ्यास करपाक कितें जाय?
ह्या प्रस्नाची जाप सोंपी आसा. तुमी मनांतले मनांत ही जाप दिवन सुध्दा मेकळे जाले आसतले.
अभ्यास करपाक सगळ्यांत पयली जाय तो ‘वेळ’. घडये तुमचे मनांत आयिल्लें उतर चुकलां आसत पूण ‘वेळ’ हें उतर ह्या प्रस्नाची जाप आसा. शाळेंत शिकपी विद्यार्थी सदांच अभ्यासाक लागून तकलेर भार दवरिल्ले वरी करतात. तांकां केन्ना-केन्ना न्हीद सुध्दां पडना. तांचे विचार, अभ्यासा कडेन पळोवपाची नदर खूब नाजूक आसता. हाचे कारण म्हळ्यार ‘वेळ.’
‘येताक चुकल्यार वावांक चुकता आनी वावांक चुकल्यार गांवाक चुकता’. ही म्हण घडये हांगा लागना आसुंये. पूण वेळेची देख दितना ह्या म्हणीचो वापर हांव एकाच कारणाक लागून करतां. तें म्हळ्यार जर वेळ वगडायत गेलो जाल्यार चुकिल्ल्या भशेन, शेणिल्ल्या भशेन तो रावता.
भुरग्यांक वेळाचें म्हत्व केन्ना आनी कशें कळटा? जाल्यार हो विचार शिक्षक आनी पालक हांणी करपाची गरज आसता. हे दोनूय घटकांक वेळाचें नियोजन करपाची चड गरज आसता. दोनूय घटकांनी जर वेळेचें पालन केलें जाल्यार भुरग्यांक हो गूण आपणावपाक चड वेळ लागचो ना. भुरग्यां कडेन सदांच उलयत रावन तांकां वेळाचें म्हत्व पटोवन दिवपाक जाय. केन्ना-केन्ना भुरग्यांक वेळाचें नियोजन आपशीच कळून येता जाल्यार कांय जाणांक ती जाणीव करून दिवची पडटा. भुरग्यांक मजा करपाक खंयूय व्हरश्यांत तांच्या उमेदीक शीम-मेर उरना. तीं आराम घेनासतना आनी आपली ताकद घालून आपलो वेळ घालतात.
तांच्या उमेदींत खंड घालिनासतना आमी तांकां अभ्यासाची जाणीव नकळत करून दिवपाची गरज आसता.
पूण ही जाणीव करून दितना तांच्या उमेदींत आनी अभ्यासांत कसलेच भेदभाव जावपाक फावना. जर जायत जाल्यार तांचे विचार बदलपाची शक्यताय आसता आनी अभ्यासांतले लक्ष पयस वचपाची शक्यताय वाडूं येता.
वेळाचें नियोजन करतना भुरग्यांक आभ्यास कसो आनी कितलो करचो हाचेर मातसो भर दिवपाची गरज आसा. उरिल्लो वेळ खेळांत घातलो म्हण हरकत ना पूण दिसाक कमीत कमी चाळीस टक्के (40%) वेळ सुरवातेक अभ्यासांत दिवचो.
अशें जायत जाल्यार हळू हळू तो वेळाचें म्हत्व शिकतलो आनी स्वता जावन अभ्यासांत आनी हेर गजालींत वेळ दितलो. अभ्यासाक वेळ दीत जाल्यार तकलेर चड ताण पडचो ना. उलट तुमी हेर गजालींत आनी वेळ दिवपाक शकतले.
भुरग्यांवरीच आमचेय मदीं आळस आनी कामां कडेन पळोवपाची नकारात्मक दृश्टी खूब भरल्या. हाचें कारण परत एकच तें म्हणटल्यार ‘वेळ’. तुमीच विचार करात. शाळेंत शिकतना बाई-मास्तर सदांच सांगतालें.
“आजचे काम आजच करा उद्द्यावर टाकू नका.”
पूण तेन्ना तें आयकपाक आमचे कडेन खंय वेळ आसलो. उपरांत वेळ वता तसो भारय माथ्यार चड पडटालो. मागीर बाईन दिल्ल्या त्या कामां कडेन पळोवपाची नदरूय बदलताली आनी तें काम करपाक जड वतालें वा वेळ चड लागतालो.
खंयचीय गजाल करतलो जाल्यार स्वता मनाची तयारी आसपाक जाय आनी दुसरें म्हळ्यार ती गजाल पुराय करपाक वेळ दिवपाक कळपाक जाय. एका मिणटाक आमी कितलीशींच पावलां मारपाक शकतात. मनीस आपल्या कामाक जर सकारात्मक दृश्टीन पळयत जाल्यार संवसारांत कठीण गजाली आपश्योच सोंप्यो जातल्यो.
खरें म्हणटल्यार मनशान सदांच सकारात्मक नदरेनच मुखार वचपाक जाय. मागीर ती कसलीय गजाल आसूं. वेळाचें नियोजन करत जाल्यार प्रत्येक गजालीक सकारात्मक नदरेन पळोवपाची मानसीक शक्त दर एकल्याक मेळटली.
- अभिजीत पागी
-अभिजीत पागी
9545338713
No comments:
Post a Comment